मुंबई :- राज्यात मराठा आरक्षणाचा लढा दिवसेंदिवस वाढत चालला आहे. यातच आता वकील गुणरत्न सदावर्ते यांच्या गाडीची तोडफोड करण्यात आली आहे. याप्रकरणी तीन जणांना भोईवाडा पोलिसांनी ताब्यात घेतले आहे. गुणरत्न सदावर्तेंच्या गाडीची तोडफोड करणारे मराठा क्रांती मोर्चाचे कार्यकर्ते असल्याचा आरोप होत आहे.
गुणरत्न सदावर्ते हे परळ येथील क्रिस्टल टॉवर येथे राहतात. आज सकाळी साडेसहाच्या सुमारास क्रिस्टल टॉवरच्या पार्किंगमध्ये असलेल्या गुणरत्न सदावर्तेंच्या गाडीची मराठा क्रांती मोर्चाच्या कार्यकर्त्यांनी तोडफोड केली . कार्यकर्ते हातात काठी घेऊन आले आणि त्यांनी बेधडकपणे गणरत्न सदावर्तें च्या गाडीच्या काचा फोडल्या. विशेष म्हणजे या कार्यकर्त्यांनी पार्किंगमधील इतर वाहनांना हात लावला नाही. फक्त गुणरत्न सदावर्ते यांच्याच गाडीची तोडफोड केली. यावेळी, एक मराठा लाख मराठाच्या घोषणाही देण्यात आल्या.
याप्रकरणी पोलिसांनी तात्काळ कारवाई करत तीन जणांना ताब्यात घेतले आहे. गुणरत्न सदावर्तेंच्या गाडीची तोडफोड करणारे तिनही तरुण छत्रपती संभाजीनगरचे असल्याची माहिती सूत्रांकडून मिळत आहे. तसेच, मला वारंवार धमक्या येत आहेत, असा दावाही गुणरत्न सदावर्तेंनी केला आहे. दरम्यान, वकील गुणरत्न सदावर्ते आणि त्यांच्या पत्नी जयश्री पाटील यांनी मराठा आरक्षणाविरोधात याचिका दाखल केली होती. ही दोघंही मुख्य याचिकाकर्ते होते. याच याचिकेमुळे मराठा आरक्षण रद्द झाले होते. यामुळे तेव्हापासूनच गुणरत्न सदावर्ते यांच्याबाबत मराठा समाजामध्ये रोष असल्याचे पाहायला मिळत आहे.
