विसर्जन मिरवणूक सुरू असताना टेम्पोचे ब्रेक फेल झाले आणि टेम्पो उताराच्या दिशेने पुढे जाऊ लागला. हा प्रकार टेम्पो ड्रायव्हरच्या लक्षात येताच त्यांनी टेम्पो मधून उडी मारून टेम्पो थांबवण्याचा प्रयत्न केला. मात्र यावेळी त्या ड्रायव्हरच्या अंगावरून टेम्पो गेला.
विसर्जन मिरवणुकीत मोठा अपघात
रत्नागिरी : कोकणात रत्नागिरी जिल्ह्यातील गुहागर तालुक्यात पाचेरी आगर येथे गणपती विसर्जन मिरवणूक सुरू असताना दुर्दैवी अपघात झालाय. विसर्जन मिरवणुकीत टेम्पो घुसून झालेल्या अपघातात दोघांचा मृत्यू तर १५ गणेशभक्त जखमी झाले आहेत. अपघातात १७ वर्षाची अल्पवयीन मुलगी व टेम्पो चालकाचा मृत्यू झालाय. विसर्जन मिरवणुकीत नाचणारे १५ भाविक जखमी झाले आहेत.
कोमल नारायण भुवड (वय १७) आणि दीपक लक्ष्मण भुवड (वय ४८) अशी मृत्यू झालेल्या दोघांची नावं आहेत. अपघातात मृत्यू झालेले हे दोघेजण व जखमी झालेले गणेशभक्त हे सगळे पाचेरी आगर येथील भुवडवाडी येथे राहणारे आहेत.
नेमकं काय घडलं?
गुहागर तालुक्यात पाचेरी आगर येथे अनंत चतुर्दशीनिमित्त गणपती विसर्जन मिरवणूक सुरू होती. दुर्दैवाने विसर्जन मिरवणूक सुरू असताना टेम्पोचे ब्रेक फेल झाले आणि टेम्पो उताराच्या दिशेने पुढे जाऊ लागला. हा प्रकार टेम्पो ड्रायव्हरच्या लक्षात येताच त्यांनी टेम्पो मधून उडी मारून टेम्पो थांबवण्याचा प्रयत्न केला. मात्र यावेळी त्या ड्रायव्हरच्या अंगावरून टेम्पो गेला. तसेच समोर नाचत असलेल्या भाविकांना या टेम्पोची जोरदार धडक बसली. या दुर्दैवी घटनेत टेम्पोमध्ये बसलेल्या १७ वर्षीय मुलीच्याही डोक्याला गंभीर दुखापत झाल्याने तिचा जागीच मृत्यू झाला आहे. यामधील जखमी झालेला चालक दीपक याला जवळच्या आबलोली ग्रामीण रुग्णालयात दाखल करण्यात आले आहे. अधिक उपचाराकरिता त्याला डेरवण येथे नेण्यात येत होते. मात्र वाटेतच त्याची प्राणज्योत मालवली.
या सगळ्या घटनेचे वृत्त कळताच गुहागर पोलीस घटनास्थळी दाखल झाले असून पोलीस उपविभागीय अधिकारी तसेच अतिरिक्त जिल्हा पोलीस अधीक्षक जयश्री गायकवाड याही थोड्या वेळात गुहागर येथे दाखल होणार आहेत.
