महायुतीची भक्कम एकजूट, विजय आपलाच- माजी आमदार सुभाष बने..महायुतीच्या उमेदवारांचा विजय निश्चित- राहुल पंडीत
देवरूख- संगमेश्वर तालुक्यात जिल्हा परिषद व पंचायत समितीच्या निवडणुकांच्या प्रचाराचा धुरळा उडत आहे. अशातच आज सोमवारी सायंकाळी साडवली सह्याद्रीनगर येथे महायुतीची साडवली पं. स. गणाची जाहीर सभा कार्यकर्त्यांच्या उत्स्फूर्त प्रतिसादात संपन्न झाली. या सभेला महायुतीच्या कार्यकर्त्यांनी प्रचंड गर्दी केली होती. या सभेत महायुतीची भक्कम एकजूट असल्याचे सांगत विजय आपलाच असल्याचे माजी आमदार सुभाष बने यांनी बोलताना सांगितले. तर साडवली पं. स. गणातील शिवसेना शिंदे गटाची उमेदवार सौ. तृप्ती सचिन मांगले यांच्या विजयासह साडवली जि. प. गटातील भाजपच्या उमेदवार सौ. रूपाली रूपेश कदम व हातीव पं. स. गणातील राष्ट्रवादी काँग्रेस अजित पवार गटाचे उमेदवार मंगेश बांडागळे या तिन्ही महायुतीच्या उमेदवारांचा विजय निश्चित असल्याचे शिवसेना शिंदे गटाचे जिल्हाप्रमुख राहुल पंडीत यांनी सांगितले.
या सभेला पालकमंत्री उदय सामंत उपस्थित राहून कार्यकर्त्यांना मार्गदर्शन करणार होते. परंतु काही महत्वाच्या कामामुळे त्यांना तुळसणी येथील सभा आटोपून तातडीने मुंबईला रवाना व्हावे लागले. प्रवासात असताना देखील त्यांनी फोनवरून उपस्थित कार्यकर्त्यांशी संवाद साधला. यावेळी ते बोलताना म्हणाले कि, महायुतीची एकजूट हाच आपल्या विजयाचा मंत्र असून या एकजुटीच्या जोरावरच साडवली जि. प. गट व साडवली पं. स. गण तसेच हातीव पं. स. गणाच्या या महायुतीच्या तिन्ही उमेदवारांचा विजय निश्चित आहे.
असे असले तरी तुम्ही गाफील राहू नका, प्रचाराचा वेग वाढवा. महायुतीचे उमेदवार निवडून आल्यावर विकासासाठी निधीची कमतरता पडू देणार नाही, तसेच आपण स्वतः तालुक्याचा दौरा करून विजयी उमेदवारांच्या आनंदात सहभागी होणार असल्याचे त्यांनी सांगितले. या सभेप्रसंगी माजी आमदार सुभाष बने, शिवसेना शिंदे गटाचे जिल्हाप्रमुख राहुल पंडीत, उपजिल्हाप्रमुख राजेश पत्याणे, तालुकाप्रमुख प्रमोद पवार, माजी जि. प. अध्यक्षा रश्मी कदम, भाजपचे जेष्ठ कार्यकर्ते मुकुंद जोशी, भाजपच्या महिला जिल्हा सरचिटणीस संगिता जाधव, तालुकाध्यक्ष रूपेश कदम, रमेश कानावले, दत्ताराम लिंगायत, प्रशांत सुर्वे, सचिन मांगले, प्रसाद सावंत, बाळू ढवळे, पंकज पुसाळकर, नितीन भोसले, प्रफुल्ल भुवड आदिंसह महायुतीचे पदाधिकारी व कार्यकर्ते मोठ्या संख्येने उपस्थित होते.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
