प्रदीर्घ प्रतिक्षेनंतर ‘आदिपुरुष’ हा चित्रपट अखेर शुक्रवारी १६ जून रोजी प्रदर्शित झाला. हा चित्रपट हिंदी, तेलुगू, तामिळ, कन्नड आणि मल्याळम या पाच भाषांमध्ये तब्बल ६२०० स्क्रीन्सवर प्रदर्शित करण्यात आला. एकट्या हिंदी भाषेतच हा चित्रपट तब्बल ४ हजार स्क्रीन्सवर प्रदर्शित झाला आहे. त्यामुळे या चित्रपटाच्या पहिल्या दिवसाच्या कमाईकडे सर्वांचे लक्ष लागले आहे.
या चित्रपटाने पहिल्या दिवशी बॉक्स ऑफिसवर किती कोटींचा गल्ला जमवला, याबाबतची अंदाजे आकडेवारी समोर आली आहे. ‘आदिपुरुष’च्या पहिल्या दिवसाचे बॉक्स ऑफिस कलेक्शन जाणून सर्वांनाच आश्चर्य वाटेल. या चित्रपटाने पहिल्याच दिवशी अनेक विक्रम रचले आहेत. ‘आदिपुरुष’ने पहिल्याच दिवशी ८५ ते ९० कोटींची कमाई केली आहे. पण हे अंदाजे आकडे आहेत व त्यात रात्रीच्या शोचा समावेश नाही. ‘एनडीटीव्हीने’ याबद्दल वृत्त दिलंय.
‘आदिपुरुष’ चित्रपटाने एकट्या हिंदीत ४५ कोटींची कमाई केल्याचं म्हटलं जातंय. या चित्रपटाने हिंदी भाषिक राज्यांमध्ये सर्वाधिक कमाई केली आहे. याशिवाय चित्रपटाने इतर दाक्षिणात्य भाषांमध्येही चांगली कमाई केली आहे. अशा परिस्थितीत प्रभासचा हा चित्रपट या वीकेंडला धमाकेदार कमाई करेल असे मत ट्रेड अॅनालिस्ट्स व्यक्त करत आहेत.
५०० कोटींचे बजेट असलेल्या या चित्रपटाबद्दल समीक्षक व प्रेक्षकांच्या संमिश्र प्रतिक्रिया आहेत. चित्रपटाच्या पहिल्या दिवसाच्या कमाईचे अधिकृत आकडे अद्याप समोर आले नाहीत, मात्र वीकेंडला हा चित्रपट दमदार कमाई करेल, असं म्हटलं जात आहे. त्याचं कारण म्हणजे या आठवड्यात ‘आदिपुरुष’शिवाय इतर कोणताही चित्रपट प्रदर्शित झालेला नाही.
