रत्नागिरी : रत्नागिरी तालुक्यातील कोतवडे लावगणवाडी येथील बौद्धवाडीच्या स्मशानाजवळील आंब्याच्या बागेत एका प्रौढाचा मृतदेह आढळला. दिलीप रामाणे (४५) यांचा हा मृतदेह असून, डोक्यात दगड घालून खून केल्याचा संशय पोलिसांनी व्यक्त केला आहे. प्रकार शुक्रवारी (१७ मार्च) रात्री ९ वाजण्याच्या सुमारास उघडकीला आला. याची माहिती मिळताच ग्रामीण पोलिस घटनास्थळी जाऊन पाहणी केली.
दिलीप रामाणे हे गावातच मोलमजुरीचे काम करतात. गावातील काही तरुण शुक्रवारी रात्री लावगणवाडी येथील रस्त्यावरून जात असताना बागेत त्यांना रामाणे यांचा मृतदेह दिसला. स्थानिक ग्रामस्थांनी पोलिस पाटलांना या घटनेची माहिती दिल्यानंतर त्यांनी रत्नागिरी ग्रामीण पोलिसांना माहिती दिली. त्यानंतर रात्री ११ वाजेपर्यंत ग्रामीण पोलिस घटनास्थळी पोहोचले होते.
मृतदेहाचा पंचनामा करून उत्तरीय तपासणीसाठी जिल्हा शासकीय रुग्णालयात पाठवण्यात आला आहे. डोक्यात दगड घालून खून केल्याचा संशय पोलिसांनी व्यक्त केला आहे. हा खून नेमका कोणत्या कारणाने केला आहे. याचा तपास पोलिस घेत आहेत.
