जि.प. माध्यमिक शिक्षण विभाग व जिल्हा विज्ञान शिक्षक मंडळाच्यावतीने आयोजित विज्ञान रंजन स्पर्धा परीक्षेचा पारितोषिक वितरण समारंभ माध्यमिक शाळा सेवक पतपेढी येथे नुकताच घेण्यात आला.
पारितोषिक वितरण कार्यक्रमाला प्रमुख अतिथी म्हणून माध्यमिक शिक्षणाधिकारी सौ. सुवर्णा सावंत, चालती-फिरती प्रयोगशाळा संयोजक श्री. बाळकृष्ण चव्हाण, रत्नागिरी तालुका मुख्याध्यापक संघाचे अध्यक्ष श्री. शैल्य पुजारी, शृंगारतळी उर्दू हायस्कूलच्या मुख्याध्यापिका श्रीम. शगुफ्ता सौराज, जिल्हा विज्ञान शिक्षक मंडळाचे जिल्हाध्यक्ष श्री. रवींद्र इनामदार, कोषाध्यक्ष श्री. मोहन पाटील, सदस्य श्री. राजेंद्र कुंभार, श्री. सुदेश कदम, रत्नागिरी तालुका विज्ञान शिक्षक मंडळाचे अध्यक्ष श्री. राजेंद्र रहाटे, तालुका सचिव श्री. इम्तियाज सिद्दिकी आदी मान्यवर उपस्थित होते. माध्यमिक शिक्षणाधिकारी सौ. सुवर्णा सावंत यांच्या व इतर मान्यवरांच्या हस्ते जिल्ह्यात आणि तालुक्यात यशस्वी विद्यार्थ्यांना पारितोषिक देऊन सन्मानित करण्यात आले.
पारितोषिक वितरणप्रसंगी सौ. सुवर्णा सावंत म्हणाल्या की, विद्यार्थ्यांनी विज्ञानाच्या प्रयत्नातून मिळणाऱ्या गोष्टींचा उपयोग चांगल्या प्रकारे करुन घ्यायला हवा. यासाठी विजेच्या दिव्याचा शोध लावणाऱ्या थॉमस अल्वा एडिसन या प्रसिद्ध शास्त्रज्ञाचे उदाहरण त्यांनी विद्यार्थ्यांना दिले. तसेच विज्ञान मंडळाच्या सर्व उपक्रमांना शुभेच्छा देत विज्ञान मंडळाचे विशेष कौतुक केले. विज्ञान मंडळाचे जिल्हाध्यक्ष श्री. रवींद्र इनामदार यांनी विद्यार्थ्यांनी संशोधनवृत्ती अंगी बाणवून विविध विषयांत संशोधन करुन जिल्ह्याचे नाव मोठे करावे असे सांगितले. भविष्यात विज्ञान मंडळाच्या माध्यमातून विविध उपक्रम राबविण्याचा मानस व्यक्त केला. रौप्य महोत्सवी वर्षानिमित्त विविध कार्यक्रम आयोजित करण्यासाठी ज्यांनी प्रत्यक्ष वा अप्रत्यक्षपणे सहकार्य केले त्या सर्वांचे आभार मानले.
तालुका मुख्याध्यापक संघाचे अध्यक्ष श्री. शैल्य पुजारी, शृंगारतळी उर्दू हायस्कूलच्या मुख्याध्यापिका श्रीम. शगुफ्ता सौराज, जिल्हा विज्ञान मंडळ सदस्य श्री. सुदेश कदम, श्री. तौसीफ अन्सारी, विद्यार्थी प्रतिनिधी कु. अदिती जाधव, कु. पायल वनगुले, पालक प्रतिनिधी सौ. सृष्टी सरफरे यांनी मनोगते व्यक्त केली. पारितोषिक वितरण समारंभाचे सूत्रसंचालन श्री. इम्तियाज सिद्धिकी यांनी केले तर श्री. राजेंद्र कुंभार यांनी आभार मानले. विज्ञान रंजन स्पर्धा परीक्षेच्या आयोजनासाठी मंडळाचे उपाध्यक्ष श्री. आर. व्ही. जानकर, कार्यवाह श्री. प्रभाकर सनगरे, सर्व पदाधिकारी, श्रीम. राखी केळकर यांनी मेहनत घेतली.
