![](https://janshaktichadabav.com/wp-content/uploads/2024/03/1000400648-1024x576.webp)
आयपीएल 2024 हंगामात लखनौ सुपर जायंट्स (LSG) नं शनिवारी पंजाब किंग्स (PBKS) विरुद्ध झालेल्या सामन्यात विजय मिळवत आपलं विजयाचं खातं उघडलंय. त्यांनी पंजाबचा 21 धावांनी पराभव केला.
*पंजाबच्या ‘किंग्स’ विरुद्ध लखनऊच ठरली ‘सुपर जायंट्स’; हाताशी आलेला सामना पंजाबनं गमावला…*
*लखनौ-* IPL 2024 LSG vs PBKS : इंडियन प्रीमियर लीग (IPL) 2024 हंगामात शनिवारी लखनौ सुपर जायंट्स (LSG) आणि पंजाब किंग्स (PBKS) यांच्यात लखनौ इथं झालेल्या सामन्यात लखनौ संघानं 21 धावांनी विजय मिळवला. पंजाबचा कर्णधार गब्बर म्हणजेच शिखर धवनची 70 धावांची खेळी व्यर्थ गेली.
*हाताशी आलेला सामना पंजाबनं गमावला…..*
या सामन्यात पंजाब किंग्जसमोर 200 धावांचं लक्ष्य होते. प्रत्युत्तरात शिखर धवनच्या नेतृत्वाखालील पंजाबचा संघ 5 विकेट गमावून केवळ 178 धावाच करु शकला. कर्णधार धवननं 50 चेंडूत सर्वाधिक 70 धावांची खेळी केली. तर जॉनी बेअरस्टोनं 29 चेंडूत 42 धावा केल्या. या दोघांनी 102 धावांची सलामी दिली होती. पण मधल्या फळीतील फंलदाज मोठी खेळी करण्यात अपयशी ठरले. परिणामी पंजाबला हातात आलेला सामना गमवावा लागला. लखनौकडून वेगवान गोलंदाज मयंक यादवनं 3 तर मोहसीन खाननं 2 बळी घेत पंजाब संघाचं कंबरडं मोडलं. त्यानं लखनौला सामना जिंकून दिला. सॅम कुरन, प्रभसिमरन सिंग आणि जितेश शर्मा हे पंजाबचे मधल्या फळीतील फलंदाज सपशेल अपयशी ठरले.
*लखनौच्या फलंदाजांची दमदार खेळी…*
तत्पूर्वी नाणेफेक जिंकून प्रथम फलंदाजी करताना लखनौ संघानं चांगली सुरुवात करत 8 गडी गमावून 199 धावा केल्या. संघासाठी सलामीवीर क्विंटन डी कॉकनं 38 चेंडूत 54 धावांची सर्वोच्च खेळी खेळली. तर या सामन्यात कर्णधार असलेल्या निकोलस पुरननं 21 चेंडूत 42 धावा आणि क्रुणाल पांड्यानं 22 चेंडूत 43 धावा केल्या. पंजाबकडून सॅम कुरननं 3 आणि अर्शदीप सिंगनं 2 बळी घेतले.
*राहुलच्या जागी निकोलस लखनौचा कर्णधार…*
लखनौ संघाचा कर्णधार केएल राहुल अनफिट आहे. त्यामुळं या सामन्यात कर्णधार होऊ शकला नाही. त्याच्या जागी निकोलस पुरन यानं कर्णधारपदाची सूत्रे हातात घेतली. केएल राहुल बदली खेळाडू म्हणून मैदानात उतरणार असल्याचं पूरननं सांगितलं होतं. या सामन्यात राहुलनं 9 चेंडूत 15 धावा केल्या.
*पंजाबचा तीन सामन्यात दुसरा पराभव….*
चालू हंगामात शिखर धवनच्या नेतृत्वाखालील पंजाब संघाचा हा तिसरा सामना, तर लखनौ संघाचा दुसरा सामना होता. केएल राहुलच्या नेतृत्वाखाली लखनौचा संघ पहिल्या सामन्यात पराभूत झाला होता. मात्र आता त्यांनी दुसरा सामना जिंकलाय. तर पंजाबनं 3 पैकी एक सामना जिंकला. त्यांनी 2 सामने गमावले आहेत.
*या मोसमात लखनौनं उघडलं विजयाचं खातं…*
पंजाब संघानं या मोसमातील पहिला सामना दिल्ली कॅपिटल्स (DC) विरुद्ध 4 गडी राखून जिंकला. तर दुसऱ्या सामन्यात रॉयल चॅलेंजर्स बंगलोर (RCB) विरुद्ध 4 गडी राखून पराभव स्वीकारावा लागला. दुसरीकडे, लखनौचा संघ राजस्थान रॉयल्स (RR) विरुद्धचा मागच्या सामन्यात 20 धावांनी हरला होता. आता दुसरा सामना जिंकलाय.