ठाणे जिल्ह्यातील तीन अंगणवाडी केंद्रांना पुरवठादार महिला बचत गटाकडून आहाराचा पुरवठा झालाच नाही. तरीही देयक देण्यात आल्याची धक्कादायक बाब समोर आली आहे.
*ठाणे :* कुपोषण आणि बालमृत्यूचे प्रमाण कमी करण्यासह बालके, गर्भवती व स्तनदा मातांचा आहाराचा दर्जा सुधारण्यासाठी अंगणवाडी स्तरावरून लाभार्थ्यांना मिळणाऱ्या टेक होम रेशन (टीएचआर) अर्थात घरपोच आहार देण्याच्या प्रक्रियेमध्ये सावळागोंधळ उघड झाला आहे. ठाणे जिल्ह्यातील तीन अंगणवाडी केंद्रांना पुरवठादार महिला बचत गटाकडून आहाराचा पुरवठा झालाच नाही. तरीही देयक देण्यात आल्याची धक्कादायक बाब समोर आली आहे.
या प्रकरणी एका पर्यवेक्षिकेला निलंबित करण्यात आले होते. मात्र, आहाराचा पुरवठा न करणाऱ्या पुरवठादाराकडून पैसे वसूल करण्याव्यतिरिक्त, त्या पुरवठादारावर जिल्हा परिषदेने कोणतीच कडक कारवाई केली नाही. या पुरवठादाराला अभय दिल्याने आश्चर्य व्यक्त होत आहे. हा प्रकार वेळीच कसा लक्षात आला नाही, हा प्रश्न कायम आहे.
सहा महिने ते तीन वर्षे वयोगटातील बालकांना तसेच, गर्भवती आणि स्तनदा माता यांना ‘टीएचआर’ दिला जातो. आधी पुरवठादाराकडून अंगणवाडी केंद्रांना त्याचा पुरवठा केला जातो. नंतर अंगणवाडी सेविका लाभार्थ्यांना ‘टीएचआर’ घरपोच देतात. ठाणे जिल्हा परिषदेच्या अंतर्गत एकूण एक हजार ६५१ अंगणवाड्या आहेत. मात्र या घरपोच आहाराच्या पुरवठ्यामधील गोंधळामुळे जिल्ह्यातील कुपोषणाची समस्या सुटणार कशी, असा प्रश्न उपस्थित केला जात आहे.
रहाटोली, अमरोली आणि जांभिळघर या तीन अंगणवाडी केंद्रात नोव्हेंबर २०२३ ते फेब्रुवारी २०२४ या कालावधीत पुरवठादार महिला बचत गटाने ‘टीएचआर’चा पुरवठा केला नव्हता. तरीही त्या बचत गटाला ९५ हजार ७४६ रुपये अदा करण्यात आले. याविषयी तक्रार आल्यानंतर, जिल्हा परिषदेच्या सामान्य प्रशासन विभागाच्या उपमुख्य कार्यकारी अधिकाऱ्यांनी बाल विकास प्रकल्प अधिकाऱ्यांसह या तिन्ही अंगणवाडी केंद्रांत पाहणी केली, नोंदवहीचीही तपासणी केली. एकंदरीत चौकशीअंती संबंधित अंगणवाडी केंद्रात ‘टीएचआर’चा पुरवठा झाला नसल्याचे स्पष्ट झाले.
दिलेल्या देयकाच्या रकमेचा भरणा न केल्यास गुन्हा दाखल करण्याचा इशारा अधिकाऱ्यांनी दिल्याने, पुरवठादाराने या रकमेचा भरणा केला. दरम्यान, कोणतीही खातरजमा न करता पुरवठादारास देयक अदा केल्याप्रकरणी एका महिला पर्यवेक्षिकाला निलंबित करण्यात आले होते. लाभार्थ्यांना आहारापासून वंचित ठेवल्याचा तसेच विहित कार्यपद्धतीचा अवलंब न करता देयक प्रस्तावित केल्याचा ठपका या पर्यवेक्षिकेवर ठेवण्यात आला होता. नंतर या पर्यवेक्षिकेचे निलंबन संपुष्टात आणण्यात आले. मात्र या अत्यंत गंभीर प्रकरणात ‘टीएचआर’चा पुरवठा न करणाऱ्या पुरवठादारावर कोणतीच ठोस कारवाई झाली नसल्याचे समजते.
*सप्टेंबरमध्ये तक्रार, नोव्हेंबरमध्ये पाहणी…*
रहाटोली बीटच्या पर्यवेक्षिकेच्या रजेच्या कालावधीत त्यांच्याकडील रहाटोली बीटचा अतिरिक्त कार्यभार निलंबित करण्यात आलेल्या पर्यवेक्षिकेकडे देण्यात आला होता. रहाटोली बीटच्या पर्यवेक्षिकेने २०२४च्या सप्टेंबर महिन्यात याबाबत तक्रार केली होती. या तक्रारीच्या अनुषंगाने अधिकाऱ्यांनी १४ नोव्हेंबर रोजी स्थळपाहणी केली होती, असेही समजते.
▪️▪️▪️▪️▪️▪️▪️▪️▪️
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
