नागपूर- महाराष्ट्रात आगामी काळात स्थानिक स्वराज्य संस्थांच्या निवडणुका पार पडणार आहेत. त्यासाठी प्रत्येक पक्ष कामाला लागले आहेत. उपमुख्यमंत्री अजित पवार यांच्या राष्ट्रवादी काँग्रेस पक्षाकडून नागपूरात पक्षाचं एकदिवसीय चिंतन शिबिराचं आयोजन करण्यात आलं आहे. या शिबिरात अजित पवार यांनी आपल्या मंत्र्यांना खडेबोल सुनावले आहेत. केवळ सुनावलेच नाही तर अजित पवार यांनी मंत्र्यांना सज्जड इशारा दिला आहे. पक्षापेक्षा मंत्री महोदयांना जर इतर कामे महत्त्वाची वाटत असतील तर त्यांनी आपली खुर्ची खाली करावी, असा सज्जड इशारा अजित पवार यांनी दिला आहे.
राष्ट्रवादीचे मंत्री इतर कामात व्यस्त असतील तर त्यांना मंत्रिपद सोडावं लागेल. पालतमंत्र्यांना तीन दिवस मतदारसंघांमध्ये काढावे लागतील, असं अजित पवार म्हणाले आहेत. तसेच पक्षाचं चिंतन शिबिर हे केवळ आगामी निवडणुकीसाठी नाही तर पुढच्या पिढीसाठी आहे. आपल्या मुलांसोबत तडजोड होणार नाही”, असंही अजित पवार म्हणाले आहेत. “महाराष्ट्राला स्थिरता, प्रगती आणि ठोस निर्णयाची गरज आहे. राष्ट्रवादी काँग्रेस पक्षाला स्व:ची ओळख आणि विचारधारा आहे. राष्ट्रवादी पक्ष हा शिवरायांच्या मार्गावर चालणारा आहे, असंही अजित पवार म्हणाले आहेत. “मी आज निर्वाणीचं सांगतो, जर पक्षापेक्षा मंत्री महोदयांना इतर कामे जास्त असतील तर ते पद आपण मोकळं करुया आणि दुसऱ्याला देऊया. माझ्यासहीत सर्वांच्या ज्या काही चुका होत असतील त्या दुरुस्त कराव्या लागतील. नाहीतर खुर्ची करावी लागेल. एवढीच नोंद मंत्र्यांनी घ्यावी”, अशा शब्दांत अजित पवार यांनी इशारा दिला.
बदललेल्या राजकारणाचा अनुभव सांगताना अजित पवारांनी म्हटले की, मी किंवा छगन भुजबळ राजकारणात आलो, त्यावेळेसचे राजकारण आताच्या राजकारणात जमीन-आकाशाचा फरक पडला आहे. आता सोशल मीडिया प्रभावी ठरतोय. काही लोक काम न करता प्रसिद्धी मिळवतात. तर काही जणांना काम करूनही त्यामानाने प्रसिद्धी मिळत नाही. ज्यांना ज्यांना ज्या जिल्ह्याचे पालकमंत्री मिळाले आहे, त्यांना त्या जिल्ह्यात जावेच लागेल. तिथे गेल्यावर तिथला जिल्हाध्यक्ष, प्रमुख पदाधिकारी, आमदार यांना बरोबर घेऊन लोकांमध्ये फिरावे लागेल. कधी कधी पालकमंत्री त्या जिल्ह्यात गेल्यानंतर स्थानिक पदाधिकाऱ्यांकडे बघतही नाही. त्यांच्याशी बोलतही नाही. अरे बाबांनो, कार्यकर्ता पक्षाचा घटक आहे. असे करू नका. माझ्यासह सर्वांना चुका दुरूस्त कराव्या लागतील नाहीतर खुर्ची मोकळी करावी लागेल, असा स्पष्ट इशारा अजित पवार यांनी दिला.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
🎤 जनशक्तीचा दबाव न्यूज..
➤ (RNI NO. MAHMAR/2014/59698)
➤ भारत सरकारमान्य रजिस्टर न्यूजपेपर
