हरारे : आयसीसी अंडर-१९ वर्ल्डकप २०२६ स्पर्धेतील सेमीफायनलचा सामना भारत आणि अफगाणिस्तान या दोन्ही संघांमध्ये पार पडला. या सामन्यातील पहिल्या डावात फलंदाजी करण्यासाठी आलेल्या अफगाणिस्तानच्या फलंदाजांनी भारतीय गोलंदाजांवर चांगलाच हल्लाबोल केला.
अफगाणिस्तानकडून फलंदाजी करताना २ फलंदाजांनी दमदार शतकं झळकावली. या शतकांच्या बळावर अफगाणिस्तानने ४ गडी बाद ३१० धावांचा डोंगर उभारला. या धावांचा पाठलाग करताना भारतीय संघालाही चांगल्या सुरूवातीची गरज होती. भारतीय संघाकडून सलामीला आलेल्या आरोन जॉर्जने दमदार शतकी खेळी केली. तर आयुष म्हात्रे आणि वैभव सूर्यवंशीने अर्धशतक झळकावून मोलाचं योगदान दिलं. हा सामना भारतीय संघाने ७ गडी राखून जिंकून स्पर्धेतील फायनलमध्ये प्रवेश केला आहे.
या सामन्यात अफगाणिस्तानच्या कर्णधाराने नाणेफेक जिंकून प्रथम फलंदाजी करण्याचा निर्णय घेतला. प्रथम फलंदाजी करताना अफगाणिस्तानला चांगली सुरूवात मिळाली, सलामी जोडीने पहिल्या विकेटसाठी ५३ धावा जोडल्या. ओस्मान सदतने ३९, तर खलिद अहमदजाईने ३१ धावा जोडल्या. तर तिसऱ्या आणि चौथ्या क्रमांकावर फलंदाजीला आलेल्या फैजल खान आणि उजैरूल्लाह नियाजईने अफगाणिस्तानचा डाव सांभाळला. फैजल खानने ९३ चेंडूंचा सामना करत १५ चौकारांच्या साहाय्याने ११० धावांची खेळी केली. तर उजैरूल्लाह नियाजईने ८६ चेंडूंचा सामना करत १२ चौकार आणि २ षटकारांच्या साहाय्याने नाबाद १०१ धावांची खेळी केली. या खेळीच्या बळावर अफगाणिस्तानने ५० षटकांअखेर ४ गडी बाद ३१० धावांचा डोंगर उभारला.
भारतीय संघाला स्पर्धेतील फायनलमध्ये प्रवेश करण्यासाठी ३११ धावांचा डोंगर उभारायचा होता. याआधी भारतीय अंडर १९ संघाने अंडर १९ वर्ल्डकप स्पर्धेत इतक्या मोठ्या आव्हानाचा यशस्वी पाठलाग केला नव्हता. त्यामुळे भारतीय फलंदाजांवर दबाव होता. पण सलामीला आलेल्या वैभव सूर्यवंशीने आपला नैसर्गिक खेळ केला. त्याने पहिल्या चेंडूपासून अफगाणिस्तानच्या गोलंदाजांवर हल्लाबोल केला. वैभव आणि आरोन जॉर्जने मिळून पहिल्या विकेटसाठी ९० धावांची भागीदारी केली. वैभवने ३३ चेंडूत ६८ धावा चोपल्या. या खेळीदरम्यान त्याने ९ चौकार आणि ४ षटकार मारले. तर आरोन जॉर्जने ९५ चेंडूत दमदार शतकी खेळी केली. कर्णधार आयुष म्हात्रेने ५९ चेंडूत ६२ धावांचे योगदान दिले. या खेळीदरम्यान त्याने ५ चौकार आणि ४ षटकार खेचले. शेवटी आरोन जॉर्ज आणि विहान मल्होत्राने महत्वपूर्ण भागीदारी करून भारतीय संघाला विजय मिळवून दिला.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
