राजस्थानमध्ये आज नव्या सरकारने शपथ घेतली. यावेळी पंतप्रधान नरेंद्र मोदी, अमित शाह आणि जेपी नड्डा यांच्यासह अनेक नेते उपस्थित होते. भजनलाल शर्मा हे राजस्थानचे नवे मुख्यमंत्री झाले असून त्यांच्यासोबत दिया कुमारी आणि प्रेमचंद बैरवा हे राज्याचे उपमुख्यमंत्री बनले आहेत.
राजस्थान /15 डिसेंबर 2023- भजनलाल शर्मा यांनी राजस्थानचे नवे मुख्यमंत्री म्हणून शपथ घेतली आहे. ऐतिहासिक अल्बर्ट हॉलच्या बाहेर हा सोहळा पार पडला. या शपथविधी सोहळ्याला पंतप्रधान नरेंद्र मोदीही उपस्थित होते. या कार्यक्रमाला पंतप्रधान मोदींशिवाय गृहमंत्री अमित शहा, भाजप अध्यक्ष जेपी नड्डाही उपस्थित होते. राज्यपाल कलराज मिश्रा यांनी भजनलाल शर्मा यांना मुख्यमंत्रीपदाची शपथ दिली. तसेच दिया कुमारी आणि प्रेमचंद बैरवा राज्याचे उपमुख्यमंत्री झाले.
या शपथविधी सोहळ्यात 6 राज्यांचे मुख्यमंत्रीही सहभागी झाले होते.
यावेळी व्यासपीठावर माजी मुख्यमंत्री अशोक गेहलोत आणि वसुंधरा राजे उपस्थित होते.
तत्पूर्वी, पक्षाच्या प्रवक्त्याने सांगितले की, “कार्यक्रमासाठी केंद्रीय नेते आणि राज्यांच्या मुख्यमंत्र्यांना निमंत्रणे पाठवण्यात आली होती. तत्पूर्वी, मंगळवारी (१२ डिसेंबर) भाजप विधिमंडळ पक्षाची बैठक झाली, त्यात भजनलाल शर्मा यांची विधिमंडळ पक्षनेतेपदी निवड करण्यात आली. पक्षाच्या वतीने आमदार दिया कुमारी आणि प्रेमचंद बैरवा यांची उपमुख्यमंत्रीपदी तर वासुदेव देवनानी यांची राजस्थान विधानसभेच्या अध्यक्षपदी नियुक्ती करण्यात आली आहे.
राजस्थानमधील 200 जागांपैकी 199 जागांवर झालेल्या निवडणुकीत भाजपने 115 जागा जिंकल्या आहेत. काँग्रेस उमेदवाराच्या निधनामुळे करणपूर जागेवरील निवडणूक पुढे ढकलण्यात आली होती, तिथे आता ५ जानेवारीला मतदान होणार आहे.
सोहळ्यासाठी कडेकोट सुरक्षा व्यवस्था…
आज होणाऱ्या सोहळ्यासाठी कडेकोट सुरक्षा व्यवस्था ठेवण्यात आली आहे. तयारीला अंतिम स्वरूप देण्याचे काम गुरुवारीही सुरूच होते. कार्यक्रमाला मोठ्या संख्येने लोक उपस्थित राहण्याची शक्यता आहे. राजधानीतील मुख्य रस्ते आणि प्रवेशद्वार सुशोभित करण्यात आले आहेत. यामध्ये भाजपचे झेंडे आणि होर्डिंग कटआउटसह केंद्र सरकारच्या विविध लोककल्याणकारी योजनांशी संबंधित पोस्टर्स आणि बॅनरही लावण्यात आले आहेत.
वाढदिवशी शपथ घेणार…
विशेष म्हणजे आज भजनलाल शर्मा यांचाही वाढदिवस आहे. त्यांचा हा 56 वा वाढदिवस आहे. गुरुवारी रात्री 12 वाजल्यानंतर भजनलाल यांनी त्यांच्या समर्थकांसोबत सोडाळा येथील चंबळ गेस्ट हाऊसमध्ये वाढदिवस साजरा केला. त्यांच्या वाढदिवसानिमित्त मुख्यमंत्री आणि त्यांच्या समर्थकांकडून रक्तदान शिबिरही आयोजित करण्यात येणार आहे. धौलपूर येथे हे शिबिर होणार आहे..
