मुंबई : देशासह राज्यात फ्लू आणि करोनाची चिंता पुन्हा वाढू लागल्याच्या पार्श्वभूमीवर मुंबई पालिकेकडून आशा सेविकांच्या भरती प्रक्रियेला सुरुवात करण्यात आली आहे. या पदासाठी अर्ज सादर करावयाचे असल्यास काही निकषही पालिकेकडून जाहीर करण्यात आले आहेत. पालिकेच्या प्रत्येक विभागाकडून याची प्रक्रिया सुरू असून कांदिवली पश्चिम या आर दक्षिण विभागात ४१५ सेविकांच्या नियुक्ती केली जाणार आहे. या भागात लसीकरणाचे प्रमाण सर्वात कमी आहे.
मुंबई पालिकेच्या वैद्यकीय व्यवस्थेमध्ये आशा सेविकांचे काम महत्त्वाचे आहे. करोना प्रादुर्भावात त्यांनी केलेल्या कामाची दखल जागतिक पातळीवरही घेण्यात आली आहे. संसर्गजन्य तसेच विविध स्वरूपाच्या आजाराचे निदान होण्यासाठी सर्वेक्षण करणे, लसीकरण कार्यक्रम, कुपोषण अशा उपक्रमांमध्ये आशा सेविकांची मदत घेतली जाते.
सध्या मुंबई पालिका क्षेत्रात १ हजार १५० आशा सेविका असून त्यांना मानधन दिले जाते. सध्याच्या आशा सेविकांची संख्या पाहता पालिकेच्या विविध विभागातील आरोग्यकेंद्रामध्ये एक हजार ते एक हजार २०० लोकसंख्येमागे एक आशा सेविकांची नियुक्ती केली जाणार आहे. त्यानुसार पाच हजार आशा सेविकांची नियुक्ती करण्याचे नियोजन होते आणि त्याला सुरुवात झाली आहे.
कांदिवली पश्चिमेच्या आर दक्षिण विभागात ४१५ सेविकांची नियुक्ती केली जाणार असून त्या प्रक्रियेला सुरुवात झाली आहे. त्यासाठी नमुना व निवडीचे निकषही देण्यात आले आहेत. इच्छुक सेविका विभागातील आणि शक्यतो जवळ राहणारी असावी, किमान शैक्षणिक अर्हता दहावी असावी, २५ ते ४५ वयोगट आणि विवाहित असणे आवश्यक असल्याचे सांगण्यात आले. २४ मार्चपर्यंत कांदिवलीच्या आर दक्षिण विभागातील वैद्यकीय आरोग्य अधिकारी कार्यालयात सादर करण्यास सांगितले आहे. मुंबईतील पालिकेच्या अन्य विभागतही आशा सेविकांची भरती प्रक्रिया सुरू आहे.
जाहिरात
