🟠 आघाडीबद्दलच्या वक्तव्याचा वेगळा अर्थ काढू नका

Spread the love

मुंबई ,25 एप्रिल-
२०२४ च्या निवडणुकीत महाविकास आघाडी एकत्र लढणार की नाही, हे आताच सांगता येणार नाही, या शरद पवार यांच्या वक्तव्यामुळे आघाडीत गोंधळ उडाला होता; परंतु स्वत: पवार यांनीच आपल्या वक्तव्याचा चुकीचा अर्थ लावू नये, असे स्पष्टीकरण केले. दरम्यान, शिवसेना खासदार संजय राऊत यांनीही महाविकास आघाडी भक्कम आहे व राहील असा विश्वास व्यक्त केला.

एकीकडे महाविकास आघाडीचे नेते राज्यात ‘वज्रमूठ’ सभा घेऊन भाजपा-शिंदे गटाच्या विरोधात रान उठवत असताना, निवडणुकीत आघाडी होणार की नाही हे माहीत नाही, असं वक्तव्य शरद पवार यांनी केल्याने सगळ्यांच्या भुवया उंचावल्या होत्या. सोमवारी पत्रकार परिषदेत पवार यांना २०२४ च्या निवडणुकीत काँग्रेस राष्ट्रवादी आणि शिवसेना एकत्र लढणार का? वंचित आघाडीही बरोबर असेल का? असे प्रश्न विचारले गेले.

तेव्हा शरद पवार यांनी, वंचित बरोबर २०२४ च्या निवडणुकीबाबत चर्चा झाली नाही. वंचितशी आमची चर्चा कर्नाटकातील विधानसभा निवडणुकीपुरती मर्यादित आहे. दुसरी कोणतीही चर्चा झाली नाही तसेच, महाविकास आघाडी म्हणून एकत्र लढण्याची इच्छा आहे; पण, इच्छा नेहमीच पुरेशी नसते. जागा वाटपाबद्दल अजून ठरलेलं काहीच नाही, असे सांगितले होते. मात्र महाविकास आघाडीचे जागा वाटप ठरलेले नाही, या आपल्या वक्तव्याचा वेगळा अर्थ काढू नये, असे स्पष्ट केले..