देवरूख- संगमेश्वर तालुक्यातील देवरुख येथील कृष्णा रेसिडन्सीच्या पार्किंगमधून मारुती झेन गाडी अज्ञात चोरट्याने लंपास केल्याची घटना घडली आहे. मात्र, चोरीची ही गाडी काही तासांतच संगमेश्वर-देवरुख मुख्य मार्गावरील लोवले येथे बेवारस स्थितीत आढळून आली आहे.
अमित वासुदेव साने (वय ५२, रा. कृष्णा रेसिडन्सी, विठ्ठल मंदिरासमोर, देवरुख) यांनी आपली सिल्व्हर रंगाची मारुती झेन कार एम एच १२सी के ०४८३ नेहमीप्रमाणे इमारतीच्या पार्किंगमध्ये उभी केली होती. दिनांक २६ एप्रिलच्या रात्री १०:३० ते २७ एप्रिलच्या सकाळी ७:३० वाजेच्या दरम्यान अज्ञात चोरट्याने ही गाडी चोरून नेली. सकाळी गाडी जागेवर नसल्याचे लक्षात येताच साने यांनी देवरुख पोलीस ठाण्यात धाव घेऊन तक्रार नोंदवली. देवरुख पोलिसांनी याप्रकरणी भा.न्या.सं. कलम ३०३ (२) अन्वये गुन्हा दाखल केला. पोलीस तपासाची चक्रे फिरत असतानाच, संगमेश्वर-देवरुख मुख्य मार्गावर लोवले येथील ‘शिव शंभो वडापाव’ दुकानासमोर एक सिल्व्हर रंगाची झेन गाडी बेवारस स्थितीत उभी असल्याची माहिती पोलिसांना मिळाली.
पोलीसांनी घटनास्थळी धाव घेऊन खात्री केली असता, ही तीच चोरीला गेलेली गाडी असल्याचे निष्पन्न झाले. चोरट्याने गाडी तिथेच सोडून पलायन केले असावे, असा प्राथमिक अंदाज वर्तवण्यात येत आहे. या घटनेची माहिती मिळताच लांजा उपविभागीय पोलीस अधिकारी सुरेश कदम आणि देवरुखचे पोलीस उपनिरीक्षक नामदेव जाधव यांनी घटनास्थळी भेट देऊन तपासाच्या सूचना दिल्या. या प्रकरणाचा पुढील तपास पोलीस हेड कॉन्स्टेबल एस. एन. कामेरकर (ब.नं. १४३०) करत आहेत. भरवस्तीतील इमारतीच्या पार्किंगमधून गाडी चोरीला गेल्याने देवरुख परिसरात काही काळ चिंतेचे वातावरण होते, मात्र गाडी तातडीने मिळून आल्याने पोलिसांनी सुटकेचा निःश्वास सोडला आहे. अज्ञात चोरट्याचा शोध सध्या पोलीस घेत आहेत.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
