*चिपळूण:* राज्यभरातील हजारो गुंतवणूकदारांची कोट्यवधी रुपयांची फसवणूक करून फरार झालेल्या टीडब्ल्यूजे कंपनीचा संचालक संकेश घाग याला अखेर चिपळूण पोलिसांनी अटक केली आहे. गेल्या अनेक दिवसांपासून पोलिसांकडून त्याचा कसून शोध सुरू होता. अखेर संकेश घाग पोलिसांच्या जाळ्यात सापडल्याने गुंतवणूकदारांमध्ये दिलासा व्यक्त केला जात आहे.
अटकेनंतर आज संकेश घागला चिपळूण न्यायालयात हजर करण्यात आले. ही माहिती समजताच फसवणूक झालेल्या गुंतवणूकदारांनी चिपळूण पोलीस ठाणे व न्यायालय परिसरात मोठी गर्दी केली होती. आपल्या गुंतवणुकीचे भवितव्य काय, याकडे सर्वांचे लक्ष लागून राहिले होते.
टीडब्ल्यूजे कंपनीने जादा परताव्याचे आमिष दाखवून राज्यभरातील हजारो गुंतवणूकदारांकडून हजारो कोटी रुपयांची गुंतवणूक स्वीकारली होती. मात्र गेल्या काही महिन्यांपासून कंपनीचे संचालक व व्यवस्थापकीय संचालक (एमडी) अचानक गायब झाल्याने गुंतवणूकदारांमध्ये तीव्र चिंता व अस्वस्थतेचे वातावरण निर्माण झाले होते.
संकेश घाग पोलिसांच्या ताब्यात आल्याने आता कंपनीचा मुख्य सूत्रधार आणि एमडी समीर नार्वेकर याचा शोध घेण्याचा मार्ग सुकर झाला असून, गुंतवणूकदारांच्या आशा पुन्हा पल्लवित झाल्या आहेत.
यापूर्वी फसवणूक झालेल्या संतप्त गुंतवणूकदारांनी आपली हक्काची रक्कम परत मिळावी यासाठी मोर्चे व आंदोलनांचे इशारे दिले होते. आता न्यायालय संकेश घागला किती दिवसांची पोलीस कोठडी सुनावते आणि पोलीस तपासात नेमकी कोणती महत्त्वाची माहिती समोर येते, याकडे सर्वांचे लक्ष लागले आहे.
🟧🟨🟩🟦🟪🟫⬛️⬜️🟥🟧🟨🟩🟦🟪🟫⬛️🟥
*🎤 जनशक्तीचा दबाव न्यूज..*
*➤ (RNI NO. MAHMAR/2014/59698)*
*➤ भारत सरकारमान्य रजिस्टर न्यूजपेपर*
