🔯 मंत्रालयासमोर वर्षभरात ८ जणांचा आत्महत्येचा प्रयत्न

Spread the love

⏩ मुंबई l 31 मार्च – आपल्यावर झालेल्या अन्यायाबाबत आवाज उठवण्यासाठी तर काहींना आपल्या समस्या सोडवण्यासाठी मंत्रालयात सारखे खेटे घालावे लागतात. वाट पाहूनही समस्या सुटत नसल्याचे पाहून अनेक जण मंत्रालयासमोरच आत्महत्येचा प्रयत्न करतात. गेल्या काही महिन्यात मंत्रालयासमोरील आत्महत्येच्या घटनांमध्ये मोठ्या प्रमाणात वाढ झाल्याचे दिसून आले आहे. त्यामुळेच मार्च २०२२ ते मार्च २०२३ या कालावधीत एकूण ८ जणांनी मंत्रालयासमोर आत्महत्येचा प्रयत्न केला. ही बाब गंभीर असल्याचे बोलले जात आहे.

चार दिवसांपूर्वी दोन महिलांसह तिघांनी एकाच दिवशी मंत्रालयासमोर आत्महत्येचा प्रयत्न केला. या घटनेने मोठी खळबळ उडाली होती. या तिघांपैकी धुळे येथील शीतल गादेकर यांचा मृत्यू झाला तर नवी मुंबईतील संगीत डवरे आणि पुण्याचे दिव्यांग रमेश मोहिते यांच्यावर उपचार सुरू असून दोघांचीही प्रकृती चिंताजनक आहे, अशी माहिती आहे.

गेल्या वर्षभरात ८ जणांनी मंत्रालयासमोर आत्महत्येचा प्रयत्न केला. ही बाब गंभीर मानली जात आहे. त्यांनी वारंवार केलेल्या तक्रारींची प्रशासन स्तरावर कोणतीच दखल घेतली जात नसल्याने हे टोकाचे पाऊल उचलले जात असल्याचे सांगितले जात आहे.