🔯 आंतरराष्ट्रीय वार्ता 🔯 ⏩पाकिस्तानात पीठासाठी नागरिकांची उडाली झुंबड; चेंगराचेंगरीत ११ जणांचा मृत्यू

Spread the love

▶️कराची- पाकिस्तान सध्या मोठ्या आर्थिक संकटाचा सामना करत आहे. या शिवाय तेथे अन्न धान्याचे संकटही निर्माण झाले आहे. तेथील गरिबीने ग्रासलेल्या सर्वसामान्य जनतेवर अक्षरशः उपासमारीने मरण्याची वेळ आली आहे. रेशनसाठी लोक इकडे तिकडे भटकताना दिसत आहेत. पाकिस्तानच्याकराची शहरात शुक्रवारी मोफत पीठ वितरण मोहिमेदरम्यान मोठी चेंगराचेंगरी झाली. यात महिला आणि मुलांसह किमान ११ जणांचा मृत्यू झाल्याचे समजते. तसेच, अनेक जण जखमीही झाले आहेत

पाकिस्तानची वाईट आर्थिक परिस्थिती आता लोकांचा जीव घेत आहे. मूलभूत अन्नपदार्थांच्या वाढत्या किमतींशी झगडत असलेल्या कुटुंबांना मदत करण्यासाठी सरकार-समर्थित योजनेचा एक भाग म्हणून मोफत पीठ वाटप केलं जातं आहे. अशाच एका ठिकाणी अकरा लोकांचा मृत्यू झाला आहे. शेजारील देशातील कराचीमध्ये मोफत पिठासाठी झालेल्या चेंगराचेंगरीत ११ जणांचा मृत्यू झाला आहे.

या योजनेचा लाभ राज्यातील 92 टक्के लोकांना मिळणार असल्याचे कार्यवाह प्रांतीय अन्न मंत्री फजल इलाही यांनी सांगितले होते. पाकिस्तानातील प्रत्येक गरजू लोकांना या योजनेचा लाभ मिळणार असल्याचेही त्यांनी सांगितले होते. पाकिस्तानचे पंतप्रधान शेहबाज शरीफ यांनी देशाच्या गंभीर आर्थिक संकटाच्या पार्श्वभूमीवर रमजान पॅकेजचीही घोषणा करण्यात आली होती.

आर्थिक संकटाचा सामना करणाऱ्या पाकिस्तानमध्ये शहरी भागात महागाई 41.9 टक्के आणि ग्रामीण भागात 47 टक्के झाली आहे. गेल्या वर्षी मात्र हे चित्र अनुक्रमे 14.3 टक्के आणि 14.6 टक्के होते. मात्र अलिकडेच, पाकिस्तानचे राज्य अर्थमंत्री असलेले तैमूर खान यांनी सांगितले होते की, यावेळी एका पीठाच्या पॅकेटची किंमत 800 रुपये होती, ती वाढून 3 हजार 100 रुपये झाली आहे. त्यामुळे पाकिस्तानातील सामान्य माणसांना आता जगणं मुश्किल झालं आहे.