📌ग्रामपंचायत पिरंदवणेमध्ये ‘मेरी माटी, मेरा देश’ अभियानाचा शुभारंभ…👉🏻स्वातंत्र्याच्या उत्सवात लोकसहभाग वाढवण्याच्या दृष्टीने विशेष उपक्रम आयोजित करण्याचा निर्णय ग्रामसभेत संपन्न.

Spread the love

संगमेश्वर | ऑगस्ट ०९, २०२३.
ग्रामपंचायत पिरंदवणे येथे स्वातंत्र्याचा अमृत महोत्सव साजरा करण्यासाठी ऑगस्ट क्रांती दिनाचे औचित्य साधून ‘मेरी माटी, मेरा देश’ अभियानाचा शुभारंभ करण्यात आला. सरपंच श्री. विश्वास घेवडे यांच्या शुभहस्ते ध्वजारोहण झाल्यानंतर उपस्थितांनी राष्ट्रध्वजाला सलामी देत वंदन केले. यानंतर राष्ट्रगीत, महाराष्ट्रगीत आणि झंडा गीताचे गायन झाले. शालेय विद्यार्थ्यांनी केलेल्या घोषणाबाजीने आसमंत दुमदुमला. याचवेळी प्रातिनिधिक स्वरूपात देशभक्त वीरांच्या स्मारकाला उपस्थितांनी वंदन केले.

यानंतर दिवे हातात घेऊन सर्वांनी पंचप्राणांची शपथ घेतली. यामध्ये ‘विकसित भारताचे लक्ष, गुलामीच्या मानसिकतेपासून मुक्तता, आपल्या समृद्ध वारशाचा अभिमान, एकता आणि एकजुटता आणि कर्तव्य भावना’ वृद्धिंगत करण्यासाठी ग्रामपंचायत सदस्य, शिक्षक, सामाजिक कार्यकर्ते, प्रतिष्ठित मंडळी, विद्यार्थी शपथबद्ध झाले. सरपंच महोदयांनी गावातील माती ग्रामसेविका सौ. मायाताई गुरखे यांच्याकडे सुपूर्द केली. शिक्षक बंधू-भगिनींनी ग्रामसभेला संबोधित करत आपली मनोगते व्यक्त केली. ‘गावातील एकोपा गावच्या विकासाचा आधारभूत घटक आहे. स्मारकाचे सौंदर्य चिरंतन काळ टिकवून ठेवण्यासाठी विशेष प्रयत्न करण्याची गरज आहे. आपल्या गावातील माती देशाच्या अमृत वाटिकेत वापरली जाणार आहे ही आपल्या सर्वांसाठी अभिमानाची गोष्ट आहे. सर्वसमावेशक नेतृत्त्व आणि राष्ट्रीय भावना कोणत्याही कार्यक्रमाला यशस्वी करते.’ अशा प्रतिक्रिया शिक्षकांनी दिल्या. ग्रामस्थांनी मनोगतातून ‘राष्ट्रीय सण-समारंभ संपूर्ण एकोप्याने साजरा करण्याचे महत्त्व विषद केले. विद्यार्थ्यांना गोष्टी सांगून भारत देश महान असण्याची उदाहरणे दिली.’ ग्रा.पं. सदस्य व सरपंचांनी आपल्या उद्बोधनात, ऐक्यभावना वृद्धिंगत करण्याचा उद्घोष करत सर्व देशवीरांना मानवंदना दिली.

यानंतर ग्रामसभा संपन्न झाली. यामध्ये ‘हर घर तिरंगा’, ‘विभाजन विभीशिका स्मृती दिवस’ साजरा करण्याचे नियोजन करण्यात आले. हाती घेतलेल्या सर्वच उपक्रमांमध्ये लोकसहभाग वाढवण्यासाठी विशेष प्रयत्न करण्याची आवश्यकता असल्याने प्रत्येक वॉर्डमध्ये उपक्रम करावे याबाबत सर्वांचे एकमत झाले. यावेळी सरपंच विश्वास घेवडे, उपसरपंच सौ. अंजली मेस्त्री, सौ. धनश्री जांभळे, सौ. मीना जांभळे, प्रकाश गमरे, कु. पल्लवी घेवडे, भाजपा कार्यकर्ते योगेश मुळे, ग्रामसेविका सौ. माया गुरखे, शाळा क्र. १ चे मुख्याध्यापक श्री. सावंत गुरुजी, घेवडेवाडी शाळेचे मुख्याध्यापक श्री. खापरे गुरुजी, निवईवाडी शाळेचे मुख्याध्यापक श्री. गडदूमवार गुरुजी, श्री. चव्हाण गुरुजी, सौ. विचारे बाई, आशासेविका सौ. सुप्रिया मेस्त्री, अंगणवाडी सेविका श्रीम. नम्रता शिंदे, पोलीस पाटील अनिल भामटे, रोजगार सेवक दीपक कदम, ज्येष्ठ नागरिक कृष्णा धोपट, रघुनाथ आंग्रे, ग्रामस्थ विश्वास गुरव, विष्णू तळेकर, ग्रा.पं. कर्मचारी संतोष माने, तसेच शालेय विद्यार्थी उपस्थित होते.