▶️ कोल्हापूर , 27 एप्रिल- कोल्हापुरातील मनप्पुरम फायनान्स कंपनीत एका कर्जदाराने नजरचुकीने कर्जाच्या हफ्त्याची रक्कम जादा भरली होती. ती परत करण्याच्या मागणीवरून कोल्हापूर शहरातील मनप्पुरम फायनान्स कंपनीच्या कार्यालयात तोडफोड करण्यात आली. यात कंपनीतील सामानाचे मोठे नुकसान झाले असून कार्यालयातील कर्मचाऱ्यांनी याप्रकरणी शाहूपुरी पोलीस ठाण्यात तक्रार दाखल केली आहे.
शहरातील दाभोळकर कॉर्नर परिसरात अयोध्या टॉवरमध्ये मनप्पुरम फायनान्स कंपनीचे कार्यालय आहे. या फायनान्स कंपनीकडून विविध प्रकारचा व्यावसायिक कर्जपुरवठा केला जातो. प्रदीप गरड (रा. कदमवाडी) या कर्जदाराने मोटारीसाठी घेतलेल्या कर्जाचा हप्ता भरण्यासाठी कंपनीतील रुपेश पाटील यांनी संपर्क साधला. तेव्हा गरड यांनी नजर चुकीने दोन मासिक हप्त्याची रक्कम भरली.
गरड यांनी जादा भरलेली रक्कम परत मिळावी, अशी मागणी केली. मात्र पैसे ऑनलाईन भरलेले असल्याने परत मिळण्यासाठी १० दिवसांचा कालावधी लागेल, असे कंपनीकडून सांगण्यात आले. मात्र गरड यांना तात्काळ पैसे हवे होते. वसुलीसाठी कर्जदारांना त्रास देणाऱ्या कंपनीने नजरचुकीने आलेले पैसेही तात्काळ परत करावे, अशी त्यांची मागणी होती. कंपनीने पैसे देण्यास नकार देताच संतप्त झालेल्या गरड यांनी दोन मित्रांसमवेत क्रिकेटच्या बॅटीच्या साह्याने कार्यालयात घुसून फर्निचरची तोडफोड केली. याप्रकरणी पोलिसात गुन्हा दाखल झाला आहे.
